KAN CHIN RAM CAAH RIAN TUAN TI KAN SAWM HNA
Haka-Thantlang miphun hawi dawt vial te hna nan dam cio hna maw?
Miphun min in ca kan kuat hna . Bawipa nih nan um nak cio ah Thluachuah in pe
cio ko hna seh. Kan ram cu nan theih cio bang kan zumh zong zumh lo zong ah ai
thleng cuahmah ko, hi ban tuk can tha lio ah kan miphun dih lak in kan duh mi
Federal uk nak , Self-determination, sifah nak in kan luat khawh nak le zalawng
te in kan biak nak ,kan ca kan holh,kan nun phung kan hman khawh nak ding caah
kan miphun dih lak in kan tuan a hauh lio can a si . Kan miphun nih lung rual
nak ti hal in kan hal lio can a si . Pakhat tuan lawng in a za lo. Cozah lawng
,CNF lawng, MP pawl lawng, Party pawl lawng tuan in kan duh nak kan phan kho
lai lo kan dih lak lung rual te in kan thil ti khawh nak kan neih chiah kan
thazang kan chuah i kan tuan a hau. Kum 50 reng lo chung ah a tu lio hi kan
Miphun nih kan saduh thah kan i tinh mi kan hmuh kan phanh khawh nak ding ah
can tha kan neih mi a si . Ral a si mi hriam tlai bu pawl le cozah zong hmun
khat ah khua an khan lio a si ,Tamada Thein Sein le Daw Aung San Suh Ci zong
hmun khat rian an tuan ti kho cang . Kan chin miphun Mi tlawm te a si mi Krifa
asi mi kan dih lak in khua kan ruah can a si. Kan i lung hrinh nak kan i rem lo
nak vial te kan i remh i fak pi khua kan ruah can a si . Kan ram kan ser than
can a si . Chin ram ka daw a ti mi lai pasal tha nusal tha hna ,Chin kan pa le
kan cathiam kan mi fim pawl kan chuah can a si,kan mirum pawl kan rum nak kan
ram caah kan hman can a si, kan mipi pawl hnu zul tu tha kan si can a si , Chin
ram cu Chin Miphun nih kan ser lo ah a ho nih dah a ser lai. Chin ram ah
chikhat rian a rak tuan ta mi miphun dang khual pawl nih an kan ser piak tak tak
lai lo.kan miphun cah dawn khan tu kan si lo nak hnga i ral ring u sih law kan
miphun kan ram caah zei te tal dah san ka tlaih ve hnga ti tu hi i zuam cio hna
u sih .
A tu lio ah Hluttaw (Parliament) chung ah Miphun party MP pawl
nih kan miphun le kan ram caah kan thil ti khawh nak ,chim awk a that chung , a
that lo zong ah kan chim chih kan duh nak vial te kan au pi kan chim kan hal
lio can a si .A phi chuak a tlawm caah le media thazang a der tuk ruang ah mipi
nih theih piak a um lo.Ral kap cozah nih a rak kan tlei dan nak vial te
,division (Tain) le (state) pine (14) ah hmun dang ah Sianghleirun (University
) le vanlawng tum nak (Airport) an nei dih an pek dih hna Chin pine lawng kan
neih lo nak,NGOs pawl luh an rak senh lo hna nak kong, Tourist luh an kham nak
hna kong , kan biak nak kan luat lo nak kong le vailamtah tung an phur nak kong
, kan ca kan holh kan phung kan lam an kan kham nak hna kong,Sifak bik dir hmun
ah an kan chiah nak kong, rian pek le reng kai zong ah an kan thei dan hna nak
kong, ram leng phan kan miphun za lawng le tlun kal khawh nak le duel citizen
pek nak kong, kan lam a that ko nak hna kong le thil hme tete kong tiang heh
tiah hluttaw ah kan chim lio a si.Kan ram a that hlan lo kan duh mi kan hmuh
hlan lo kan chim peng lai kan chim chin leng mang lai .Kan mipi hi kan thazang
kan hram nan si nan kan dir kamh peng a hau .
A tu kum khat le ceu chung ah hluttaw ah kan chim khawh mi hna
cu, a um bal lo mi a si caah a tlawm ko na in phaisa kum 2012 April thla in
2013 April thla tiang kum khat Chin cozah kan hman ding mi budget cu US million
(14 ) a si. A tu an thut cuah mah mi Pyithuh hluttaw (parliament ) ah
University le Airport amin pek kan si cang, A ran khawh nak hnga chim chih peng
a hau rih. Haka Khuachung lam Kattaza khin than a si. Haka ah district khazan
zung tuah a si lai. Thantlang peng vailam tlang lam cu Kawl Ram - Chin Ram
-India Ram pehthlaih nak lam pi pyitaungsuh lam ah ser a si tuan hram thok a si
cang, Thantlang Myo cu nesat khua Boarder trade ah ser ding in timh tuah lio a
si, Haka - Paletwa lam cawk ding in hna tlak nak tuah a si, Khuapi le khua te
lam that khawh nak hnga rian tuan hram thok a si . Siang in,Sizung a that khawh
nak hnga tuan hram thok a si, kaih check, khual check, kuli phurh, hmatpungtin
check, tlangrian tuan , ar tlaih a um ti lo. Zapi theih khawh mi a pipa deuh in
ka vun tial mi a si .
A dongh nak ah tial ka duh mi cu Chin National Party MP pawl nih
kan si khawh chung in ram caah kan i pek cang ban tuk in kan ram kan miphun kan
mipi caah kan tuan peng ve ko lai kan i zuam chin ve ko lai . Sihmanh seh law
tuan khawh nak thazang kan mipi sin in dirkamh bawmh kan hreh chaw va in siseh,
ruah nak fimthiam nak in siseh bawmh kan herh hring hran ko . A tu lio
Haka-Thantlang Miphun party (CNP) hi zung hlan nak kan nei lo ,ca tial nak zong
kan nei lo, MP pawl lahkhah hi 10% an kan phiat,EC pawl an mah hmanh lahkhah
pek ding an si na in an mah tu nih thla khat 5000 cio an thawh, cu ti cun rian
tuan a si. CNP party cu Miphun dang ai bochan lo Pathian le kan Chin miphun
bochan bak in dirh mi Miphun party a si . Kan Miphun nih nan kan dir pi nan kan
bawmh lo ah cun rian a tuan kho lai lo . Cucaah Miphun hoi Pasal tha nusal tha
hna kan chin ram caah internet le bia lawng si lo in na chaw va in thazang rak
chuah ve law rian rak tuan ve tiah Miphun min in toidor nak le u pat nak he kan
sawm hna . Ho dah ai tel lai ho dah a zam lai. Challenge kan tuah ko hna .Kan
ram le kan miphun nih rak ka bawm ve tiah an sawm . Na ram na Miphun na
daw tak tak maw? .
Bawmh kan herh tak tak mi hna cu ( Haka le Thantlang zung caah)
Pahnih cio an hau ti nak a si
1. Zung Hlan nak thlakhat thong sawm riat. (80000/-)
2. Zung rian tuan nak caah Computer pa khat.(500000/-)
3. Copier le printer (500000/-)
4. Motor cycle pakhat (500000/-)
Ram caah rian tuan a duh mi bawmh nak a kan pe mi hna nan min
nan khua a zat cu CNP record ah tha te in kan chiah lai, Upat nak he theih ter
nak kan in tuah than hna lai . Mipi sin ah media in kan thanh lai zung ah nan
min tar in kan langhter lai. Company maw thil pa khat khat tuah na duh tik ah
Upadi chung in kan in dir kamh ve lai . Bawmh nak pek duh mi ram leng um mi na
si ah cun phung ning upadi ning in bawmh khawh a si. A khua in siseh , Pum pak
in siseh, mah le ti khawh zat in bawmh le i tel khawh nan si. Mi Pakhat nih
phun khat zong bawmh khawh a si ,a si na in pa khat bawmh cu a har tuk lai caah
mah ti khawh zat cio bawmh khawh a si.( Abianaah Minung 25 nih 80000= US 100
cio si lo ah minung100 nih 8000=US 25 cio ) nan kan bawmh khawh ah cun rian
tuan nak kan herh tuk mi a tlam a tling hnga. (Lai Ram le Lai Miphun caah lai
pasal tha nusal tha minung 100 dirkamh tu kan herh ko ho dah ai tel ngam lai ).
Haka - Thantlang nan khua cio ca , mipi ca zong a herh mi hal le ruah nak cheuh
khawh a si . Haka -Thantlang CNP party le MP pawl he pehtlaih nak neih a duh mi
poah le bawmh nak ai tel mi poah nih nan ID a tu mail ah hin rak kua u law
Vakok Club ah kan rak in khumh hna lai i pehtlaih nak tuah a si lai. Duh mi hal
bia ruah khawh a si lai . nan ID nan kan kuat in kan group mail ah kan rak in
luh hna lai invite kan in tuah hna lai nan rak kan yes nak lai vun tial chih ka
duh. Lung lomh nak tampi he,
(Mah ca hi Haka -Thantlang EC biachah nak in ka rak thlak mi a
si )
Haka- ThanTlang Chin National Party Ai awih in,
Lal Maung Cung
Member of Parliament
Email; cinzahlmc@gmail.com