Saturday, November 10, 2012

Hakha Peng CNP le Pu Hung Ngai

HAKHA PENG CNP NIH LAITLANG COZAH RIANTUANTU HNA RIANTUANNAK KONG LE
RAMMI HARSATNAK LAITLANG COZAH SIN AN LANGHTERMI KONG PU HUNG NGAI
NIH ZAPI SIN FIANTERNAK A TUAH

Chin cozah lutlai Pu Hung Ngai nih Sept. 29, 2011 Hakha khua Town hall
ah Hakha khua le Thantlang khua um cozah riantuantu vialte le Hakha,
khua upa zeimawzat a auh hna i Laitlang cozah nih zungkip an
riantuannak fianternak a tuah. Hi tan ah Department 10 nih an
riantuannak kong zapi sin ah fianternak an tuah.

Hi tonnak a tuahnak a ruang cu: Hakha myone CNP party nih Laitlang
Chief Minister Pu Hung Ngai sin ah Laitlang cozah riantuantu hna
riantuannak clean gorvernment and good gorvernment si khawhnak ding le
rammi harsatnak kong kha Sept. 21, 2011 i cozah sin ah ca an pekmi
ruang ah a si' tiah meeting a kaimi cozah riantuan pakhat nih a chim.
"Cu an ca chung ah cun Laitlang cozah riantuantu hna nih an
riantuannak ah a ningcang lo in an tuannak zeimawzat an langhter i hi
bantuk dinfellonak kong remhpiak ding an duhnak zong an langhter' tiah
a peh.  "Hi kan ca ah, Chief Minister Pu Hung Ngai sin lawng si lo in
Laitlang Hluttaw vialte, Laitlang Vuanci vialte le CNP Centre office
tiang copy kan pek tiah CNP upa pakhat nih a chim. Cucaah Pu Hung Ngai
nih Chin pyne (tthanah) Department kip pyne-hmu pawl kha a auh hna i
hi kong ah fakpi in hlathlainak le ralrinnak chimhhrinnak zong a pek
hna. Abik in a sikmi hna ah sipin hmu (municipal) zong aa tel tiah a
chung thil a theitu cozah riantuan pakhat nih a chim. Cucaah zapi sin
ah fianternak a tuahnak a si tiah a peh. Hi fianternak an tuahnak ah
khuami upa zeimawzat an kai i pahnih nih biahalnak an ngeihmi le cozah
lei nih lehnak hna kha a biapi deuh vial a tanglei ah kan van
langhter:

1. 'Sipin nih lamkam mei vaannak ah tiin inn khat ks. 2000 an khawlhmi
kong kan fianh u' tiah an hal i "Pu Hung Ngai nih ks. 2000 a si lai
lo" tiah a leh nain khua upa nih vouchers thate in an kan pekmi kan i
chiah ko tiah a leh.

2. Akhuun zung nih ramdang kalnak pungsan 17 laak tikah ks. 21000
(thong kul le thongkhat) an kan laakmi khi a rate rikhiahpiakmi a um
maw? Zeizat set dah a si? tiah an hal i tuanvo ngeitu nih tha in  a
let kho lo. Pu Hung Ngai nih "hi hmanh hi a tlawmtuk, hi pin ah "0"
pakhat hmanh chap rih ding a si' tiah a leh.

3.Inn kip ah mei (electrict) a rawh i mei lei tuanvo ngeitu auh tikah
electrict tung voi khat kai man ah ks. 2000 an kan laak tiah an hal i
a man kan la bal lo, a lak in kan tuah ko, a man laak ding a si lo, a
lami an um ahcun rak kan chim u law kanmah nih fakpi in kan rak ti hna
lai, hihi cu kan naule nih anmah nawl in an tuahmi a si, tiah mei lei
tlaitu nih a leh. 'Atu cu mei hmante in kan pek cang, a bik in special
line vialte a um ti lo. Kawlram chung ah mei kong ah ahohmanh special
in mei hman ti a um awk a si lo,' tiah Pu Hung Ngai nih a leh. Cu hlan
cu Hakha khua chung ah special line 160 renglo phaisa a hlei laak in
an rak pek hna. Cu ruang ah zapi nih mei kan rak i zaat lo hi a si. Cu
hlan cu zan thum chung ah suimilaam pahnih lawng an rak pek. Atu CNP
nih an chim hnu ah cun zan thum ah suimilaam 12 an pek cang. Cun, a
karlak ah zan 12:00 in a thaizing chun 12:00 tiang an pek cang.

4. Cubantuk thiam in phone a rawh i remhpiak ding in kan auh hna tikah
voi khat remh ah ks. 2000 in a cunglei an kan laak, tiah an hal. "Hi
kong ah zung lei in laak ding kan timi a si lo, nan sin a rami kan
naule nih anmah nawl in an laakmi a si. Hihnu i an laak ahcun rak kan
chim ulaw kanmah nih kan chimhhrin hna lai', tiah tuanvo ngeitu nih a
leh.

5. Cozah zung Department kip khua chung hnawm thianh riantuanter kong
ah Hakha myone Auhchohzihmu nih "cozah nih hi thianhhlimhnak ah zahceo
lawng phaisa an kan pek khawh. A tangmi cu kanmah khuami nih kan
thazaang in kan tuan lo ahcun kan rian a tlamtling kho lo tiah a leh.
"Hi kong hi ramleng lei zong in zeitluk in an kan ti zong ah hi cu
kanmah khua le ram ca i kan tuahmi a si. Kan ngol lai lo, kan tuah
thluahmah lai" tiah Pu Hung Ngai nih fak ngai in a chap.

6. Singhngakchia kan fale thingtan hna nan thawhtermi hna khi? tiah an
hal i pyne pyngiazihmu nih "hi cu saya/ma te nih kan herh tawn caah a
si" tiah a leh i Pu Hung Ngai nih " hi cu nan tuah ti lo ah a tha"
tiah a leh.

7. Inn hmun tah tik ah metai pawl nih ks. 5000 (thong nga) leng an
laakmi kong ah Pu Hung Ngai nih rak la ti hna hlah u" tiah a leh.

8. "Sizung qtr. chung ah an zuarmi sii le lakphak khi a leng nak in a
man a fak deuh," tiah an halmi kong ah, Pu Hung Ngai nih "hi kong hi
siizung uk nih feltein rak remh seh" tiah a leh.

9. CNP nih an pekmi ca chung ah; khaini, raja, 92 le OB hna hi ritnak
sivai phun ah kan chiahpiak ulaw kan khap piak u, tiah an rak
langhter. Hi kong hi ngandamnak lei in Sizung uk le palik lei in
tuanvo ngeitu palik bawi nih "a sikhawh chung in kham ding" ah an
chim. Palik lei bawi nih 'kan khap lai i hi bantuk a tuahmi le a
phurmi cu zapi zong nih kan bawm ulaw van report ve hna u', tiah a ti.
Pu Hung Ngai nih "a van report khotu cu pakhat ks. thong nga in thong
hra tiang laksawng pek ding" tiah a chap.

10. 'Settuaizi zung kan kal tikah riantuantu hna nih tazaihkhawng le
cabawm an kan cawktermi khi atu chan ah nungak cakuat hmanh cabawm
hman a si ti lo" tiah an hal i "cubantuk cu a si awk a si lo" tiah Pu
Hung Ngai nih a ti.

11. Myone Auhchohzihmu nih khualtlung cazin (ehsazin) tuah ding kong a
chim i, "a laak man phaisa zong pe hna seh" tiah Pu Hung Ngai nih a
chap.

12. 'Zungkip ah thohkhaanca an laak tikah cazin tuahman ks. 250 in la
hna u' tiah Pu Hung Ngai nih a chim.

13. "Zungkip riantuantu pawl nan zung minung vialte thate in ralrinnak
pe hna u. Zapi lei in report le chimrel a um sual ahcun nan fawi lai
lo" tiah Pu Hung Ngai nih ralrinnak a pek hna.

Hi meeting ah minung thong hnih hrawng an kai. Chun 12:00 in zanlei
5:00 tiang an tuah. Hi meeting ah Laitlang vuanci pawl an tling dih na
in biachimnak le bia lehnak an ngei lo. A ruang cu, CNP nih an ca i an
langhtermi ah, zung riantuannak kong hi cozah thar an kai hlan thil
deuh a si caah Chief Minister nih riantlaitu pynehmu pawl a fianter
hna nak a si tiah CNP upa pakhat nih a ti.

Tutan tonnak cu cozah le mipi, democracy phunglamtlai in a hmasabik i
tonnak kan ngeih khawmi a si, democracy rim a nanpah ve ko, zeicatiah
an riantuannak kong hna an hmai ah kan van hal hna le an van kan leh
vemi cu" tiah khua upa pakhat nih a ti. ' Democracy dirhmun in Pu Hung
Ngai nih mipi hmai i a biachimmi belte zapi tihzahnak le upatnak a
tlawmtuk rih. Hi zong hi a ralkap zia a fimthiang tuk rih lo caah a
si, tiah a peh.

No comments:

Post a Comment

Post a Comment